འཁྲུངས་སྐར་བསུ།

ཀརྨ་པ། ཁྱེད་ནི་ལོ་རྒྱུས་ཀྱི་བྱུང་བ་རྒྱུན་རིང་ལ་མཛད་རྗེས་ཀྱི་རྣམ་ཐར་ཕུལ་དུ་བྱུང་བའི་གངས་ཅན་བོད་ཀྱི་མགོན་སྐྱོབ་བླ་ན་མེད་པ་ཞིག ཁྱེད་ཀྱི་བླ་མེད་ཀྱི་ཐུགས་བསྐྱེད་དང་ཟླ་མེད་ཀྱི་མཛད་རྗེས་དུ་མས་ཆོས་སྲིད་ལུགས་གཉིས་ཀྱི་མངའ་ཐང་རྒྱས་མྱོང་བའི་གངས་ཅན་བོད་ཀྱི་ལོ་རྒྱུས་ཁྲོད་དུ། མི་ལོ་དགུ་བརྒྱ་ཙམ་གྱི་དུས་ཡུན་རིང་མོར་གསེར་འོད་འཕྲོ་བའི་གཟི་བརྗིད་ཀྱི་རིན་ཐང་གསལ་པོ་བསྣན་ཡོད། དེ་ཡང་མདོ་ཏིང་ངེ་འཛིན་རྒྱལ་པོ་ལས། ང་འདས་ལོ་ནི་ཉིས་སྟོང་ན།། གདོང་དམར་ཡུལ་དུ་བསྟན་པ་འབྱུང་།། བྱང་ཆུབ་སེམས་པ་སེངྒེའི་སྒྲ།། ཀརྨ་པ་ཞེས་བྱ་བ་འབྱུང་།། ཏིང་འཛིན་དབང་ཐོབ་འགྲོ་བ་འདུལ།། མཐོང་ཐོས་དྲན་རེག་བདེ་ལ་བཀོད།། ཅེས་འཁྲུལ་མེད་རྡོ་རྗེའི་ལུང་གིས་བསྔགས་པ་ལྟར། དུས་གསུམ་མཁྱེན་པའི་སྙིང་སྟོབས་དང་། ཀརྨ་པཀྵིའི་རྫུ་འཕྲུལ། རང་བྱུང་རྡོ་རྗེའི་ཉམས་ལེན། ཆོས་གྲགས་རྒྱ་མཚོའི་རིགས་རྩལ། མི་བསྐྱོད་རྡོ་རྗེའི་མཁྱེན་རླབས། ཆོས་དབྱིངས་རྡོ་རྗེའི་བཟོད་སྒོམ། རིག་པའི་རྡོ་རྗེའི་འཕྲིན་ལས་སོགས་ཁྱེད་ཀྱི་གསང་གསུམ་གྱི་མཛད་པ་ཟབ་མོས་བསྟན་འགྲོར་ཕན་བདེ་བསྒྲུབས་པའི་གཟི་བརྗིད་ཀྱི་རྣམ་ཐར་ནི་རི་བོ་ལས་དཔངས་མཐོ་ཞིང་རྒྱ་མཚོ་ལས་གཏིང་ཟབ། ད་དུང་ཡང་། རབ་བྱུང་ཆས་ལ་ཞྭ་ནག་ཅན།། སྟོང་གི་བསྟན་པ་མ་ནུབ་བར།། འགྲོ་བའི་དོན་ལ་རྒྱུན་ཆད་མེད།། ཅེས་མདོ་སྡེ་ལང་ཀར་གཤེགས་པ་ལས་གསུངས་པ་བཞིན་སངས་རྒྱས་སྟོང་གི་བསྟན་པ་མ་རྫོགས་ཀྱི་བར་དུ་ཁྱེད་ཀྱི་འཕྲིན་ལས་ཀྱི་འཇུག་པ་ནམ་ཡང་འགག་མི་སྲིད་ཅིང་། སྤྲུལ་པའི་རོལ་གར་རྒྱུན་ཆད་མེད་པར་བྱོན་པའི་ངོ་མཚར་གྱི་རྣམ་ཐར་ལྟར། ཐུགས་བསྐྱེད་ཀྱི་འཇུག་པས་གངས་ཅན་བོད་ཀྱི་བདེ་སྡུག་ཐུགས་སུ་བསྣམས་ཏེ། སྤྲུལ་བསྒྱུར་གྱི་བཀོད་པ་མཚན་དཔེའི་ཟློས་གར་སླར་ཡང་བཞད་པའི་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་ཞེས། དོན་བརྒྱུད་གསེར་གྱི་ཐག་པའི་རྒྱུན་མ་ཆད་ཅིང་སྤྲུལ་བརྒྱུད་མུ་ཏིག་གི་ཕྲེང་བར་ལྷད་མ་ཞུགས་པའི། རྒྱལ་སྲས་བྱང་ཆུབ་སེམས་དཔའི་ངོ་མཚར་གྱི་བཀོད་པ་མིའི་གཟུགས་སུ་བྱོན་པ་ནི་རྒྱལ་བ་ཀརྨ་པ་སྟེ། ལོ་ངོ་དགུ་བརྒྱ་ལྷག་གི་ལོ་རྒྱུས་ཀྱི་རྒྱབ་ལྗོངས་མངའ་བའི་སངས་རྒྱས་ཀྱི་སྲས་པོ་ཞིག ལོ་ན་བཅོ་ལྔ་ཙམ་གྱི་ལང་ཚོ་རྫོགས་པའི་སྙིང་སྟོབས་ཅན་གྱི་མི་བུ་དར་མ་ཞིག རང་རིགས་ལ་དུང་ཞིང་རང་དབང་ལ་དགའ་བའི་ཐུགས་འདུན་ཟབ་མོས། མུན་ནག་གི་ཁྲོད་ནས་ཧི་མ་ལ་ཡི་རི་བོ་བརྒལ་ཏེ་འཕགས་པའི་ཡུལ་དུ་གོམ་སྟབས་ཡངས་པོར་བསྒྱུར། བླ་མེད་ཀྱི་དབུ་ཁྲིད་ཅིག་གི་ཐུགས་འདུན་ཡོད་ཚད་བསྐང་ཞིང་། ཆོས་ལྡན་གྱི་ཞིང་ཁམས་ཤིག་ལ་རེ་བའི་ཚེ་སྲོག་ཟབ་མོ་བྱིན། ངོ་མཚར་གྱི་རྣམ་ཐར་དང་། གཟི་བརྗིད་ཀྱི་མཚན་དཔེ། རླབས་ཆེན་གྱི་མཛད་སྤྱོད་སོགས་ཀྱིས་ཞི་བདེའི་ལམ་སྟོན་པ་ཆེན་པོ་ཞེས། འཛམ་གླིང་ཤར་ནུབ་ཀྱིས་མཚོན་པའི་ས་ཆེན་གྱི་ཁམས་སུ་མཚན་སྙན་ཉི་ཟླ་ལྟར་གྲགས་པར་གྱུར། ཀརྨ་པ། ཁྱེད་ནི་དུས་རབས་ཉེར་གཅིག་པའི་སྤྱི་ཚོགས་ཁྲོད་དུ་བླ་ན་མེད་པའི་གཟི་བརྗིད་ཀྱི་མཛད་རྗེས་མངའ་བའི་ཕུལ་བྱུང་གི་ན་གཞོན་བསམ་བློ་བ། འཛམ་གླིང་གོ་ལ་རིལ་པོར་སྙིང་རྗེ་དང་འབྲེལ་བའི་ཀུན་སྤྱོད་སྤེལ་བའི་ལམ་སྟོན་པ་ཆེན་པོ། རང་བྱུང་གི་ཁམས་དང་སྐྱེ་འགྲོའི་ཚེ་སྲོག་ལ་གཅེས་སྤྲས་བྱེད་པར་འགྲོ་བ་མིའི་སྣེ་ཁྲིད་ཉག་གཅིག ཁྱེད་ཀྱི་ཞལ་གསུང་གི་བདུད་རྩི་ཟེགས་མ་རེ་རེས་འཛམ་གླིང་སྐྱེ་བོ་མང་པོས་འཕྲལ་ཡུན་གྱི་སྡུག་བསྔལ་སེལ་བའི་སེམས་ཁམས་ཀྱི་སྨན་པ། གངས་ཅན་ཁ་བའི་ལྗོངས་ཀྱི་མི་རིགས་ཀྱི་བདེ་སྡུག་ལ་སེམས་ཁུར་དང་ལྷག་བསམ་བྱེད་པའི་སྙིང་སྟོབས་ཀྱི་དཔེ་མཚོན། ལོ་རྒྱུས་ཀྱི་རྒྱུན་རིང་ཞིང་མཛད་རྗེས་ཀྱི་དཔངས་མཐོ་བའི་བོད་ཀྱི་སྤྲུལ་བརྒྱུད་ཡོངས་ཀྱི་རྒྱལ་པོ་སྟེ། རྒྱལ་ཀུན་འཕྲིན་ལས་ཀྱི་སྙིང་པོ་གཅིག་ཏུ་བསྡུས་པའི་མུན་ནག་གི་གསལ་སྒྲོན་ཀརྨ་པ། མཐོ་རིས་ཀྱི་ལམ་སྟོན་ཀརྨ་པ། འགྲོ་དྲུག་གི་འདྲེན་པ་ཀརྨ་པ། ཁྱེད་ཡོད་པས་ང་ཚོས་མུན་ནག་གི་འཁོར་བ་ལ་གདོང་གཏད་ཕོད་ལ། ཁྱེད་ཡོད་པས་ང་ཚོས་འོད་གསལ་གྱི་ཞི་བདེ་ལ་རེ་བ་བྱེད་ཆོག་ ཁྱོད་ལ་བསྟོད་པ་ནི་ཕྱོགས་བཅུའི་སངས་རྒྱས་ལ་བསྟོད་པ་ཡིན་ལ། ཁྱེད་ལ་དུང་བ་ནི་འགྲོ་དྲུག་སེམས་ཅན་ལ་དུང་བ་ཡིན། དེས་ན་ངས་འདི་ནས་རྒྱལ་སྲས་སེམས་དཔའ་ཆེན་པོ་དཔལ་རྒྱལ་བའི་དབང་པོ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་སྐུ་ཡི་འཁྲུངས་སྐར་ལ་བཀྲ་ཤིས་བདེ་ལེགས་ཞུ་བ་དང་ཆབས་ཅིག ཁྱེད་ཀྱི་སྐུ་ཚེ་བསྐལ་བརྒྱའི་བར་དུ་བརྟན་ཅིང་། མཛད་འཕྲིན་ཉི་ཟླའི་འོད་སྣང་འཛམ་གླིང་ཤར་ནུབ་ཡོངས་ལ་ཁྱབ་པའི་བཀྲ་ཤིས་སྨོན་འདུན་ཞུ། གུས་བཀྲ་ཤིས་སྙན་གྲགས་ནས།